Motorsport
Mathieu Serradori jirbaħ it-tmien stadju tad-Dakar Rally, il-muturi ma jtellqux

Fit-tmien stadju li sar matul il-ġurnata tat-Tnejn, il-Franċiż Mathieu Serradori rebaħ f’distanza ta’ 477 kilometru u spiċċa quddiem l-Ispanjol Fernando Alonso li resaq l-aktar viċin li forsi jirbaħ stadju meta temm fit-tieni post. L-istadju tat-Tnejn kien madwar Wadi al-Dawasir fl-Arabja Sawdija. Mhux daqstant stadju feliċi għall-Ispanjol Carlos Sainz li ra l-vantaġġ fil-quċċata tal-klassifika jitnaqqar għal 6 minuti u 40 sekonda b’Nasser Al-Attiyah għadu qed jittama li jaqbeż lil Sainz sa tmiem ir-Rally.

Fil-muturi, matul il-ġurnata tat-Tnejn ma saritx il-kompetizzjoni b’turija ta’ rispett lejn Paulo Goncalves li miet il-Ħadd li għadda waqt it-tellieqa, bl-Amerikan Ricky Brabec jinsab fuq quddiem, 24 minuta fuq iċ-Ċilen Pablo Quintanilla.

Miktub minn...
Chris Falzon
Ġurnalist ta' TVM Sport. Isegwi l-isport lokali u internazzjonali. Isegwi u jirrapporta l-futbol lokali u internazzjonali. Huwa parti mit-tim tal-produzzjoni tal-programm 90 MINUTA