Motorsport
Moto GP: Marc Marquez jirbaħ fi Spanja u jitla’ l-ewwel fil-klassifika

Iċ-champion renjanti Marc Marquez reġa’ rritorna fil-quċċata tal-klassifika wara li rebaħ il-Moto GP f’pajjiżu, fuq iċ-ċirkwit ta’ Jerez. Is-sewwieq tal-Honda mar fuq quddiem mal-ewwel kantuniera u żamm l-ewwel post sat-tmiem, bl-ewwel tliet sewwieqa jkunu kollha Spanjoli. Alex Rins fuq Suzuki daħal fit-tieni post, b’Maverik Vinales fuq il-Yamaha jidħol it-tielet.

L-Ispanjol Marquez issa għandu 70 punt fil-klassifika, punt biss fuq il-kompatrijott Rins li għandu 69. Wara li Andrea Dovizioso spiċċa r-raba’ f’Jerez, huwa niżel fit-tielet post tal-klassifika u għandu 67 punt. Għat-Taljan Valentino Rossi dan il-Moto GP kien pjuttost sodisfaċenti meta wieħed iqis li telaq mit-13-il post, imma finalment irnexxielu jispiċċa fis-sitt post.

Miktub minn...
Chris Falzon
Ġurnalist ta' TVM Sport. Isegwi l-isport lokali u internazzjonali. Isegwi u jirrapporta l-futbol lokali u internazzjonali. Huwa parti mit-tim tal-produzzjoni tal-programm 90 MINUTA