Futbol lokali
Partitarji ta’ Valletta FC jorganizzaw carcade quddiem l-Istadium Nazzjonali f’Ta’ Qali

Partitarji ta’ Valletta FC, illum wara nofsinhar, organizzaw carcade quddiem l-Istadium Nazzjonali f’Ta’ Qali.

TVMSport tkellem ma’ wħud mill-partitarji li kienu preżenti f’dan il-carcade li spjegaw li din l-inizjattiva ttieħdet għaliex “iddejqu mingħajr futbol.”

Partitarji oħra li tkellmu ma’ TVM Sport qalulna li kienu qed jiċċelebraw il-Kampjonat BOV Premier li ntrebaħ fl-istaġun li għadda kontra Hibernians FC.

Il-partita ‘decider’ bejn Valletta FC u Hibernians FC għar-rebħ tat-titlu kienet intlagħbet fl-4 ta’ Mejju 2019, u għada t-Tnejn hu l-ewwel sena anniversarju.

Serbut ta’ madwar 400 karozza telaq mill-Belt Valletta sal-parkeġġ ta’ quddiem il-West Stand tal-Istadium Nazzjonali.

Il-Kampjonat BOV Premier jinsab wieqaf wara 20 ġurnata bid-deċiżjoni hux se jitkompla jew le li għandha tittieħed aktar tard dan ix-xahar.

Illejla TVMSport jiddibatti proprju jekk il-kampjonat għandux jitkompla jew le fi programm speċjali li jibda fid-20:45 fuq TVM2: bil-kummenti tal-presidenti u uffiċjali oħra għolja fl-amministrazzjoni tal-klabbs fl-ewwel sitt postijiet tal-klassifika u bil-kummenti wkoll tal-President tal-MFA Bjorn Vassallo.

Miktub minn...
TVM Sport