L-ewwel avveniment ta’ wara l-waqfa minħabba l-pandemija tal-Malta Amateur Athletic Association kien suċċess.
Dan l-avveniment kien ukoll l-ewwel wieħed f’era ġdida għall-Assoċjazzjoni wara l-elezzjoni ta’ President ġdid, Andy Grech kif ukoll kumitat ġdid. L-avveniment sar bil-bibien magħluqa u fir-rispett sħiħ tal-protokolli disposti mill-awtoritajiet tas-saħħa. Dan kien l-ewwel avveniment kompetittiv fost kull sport f’Malta wara l-waqfa minħabba r-restrizzjonijiet preċedenti.
L-akbar riżultat tal-ġurnata kien ir-rekord nazzjonali ġdid fil-hammer throw għal Luca Martini (Rush AC, 56.96m), li tejjeb ir-rekord preċedenti ta’ Mario Mifsud (Allcomers Aloysians) li spiċċa t-tieni.
Fit-tellieqa tal-100 metru Luke Bezzina ta’ St.Patrick’s irritorna għar-rebħ b’ħin b’saħħtu ta’ 11.03, ħarira aktar minn ħin ta’ taħt 11-il sekonda, li tista’ tgħid hija l-ambizzjoni ta’ kull atleta elite f’pajjiżna.
Ian Paul Grech (Pembroke Athleta) u Warren Zammit, (Rush AC) spiċċaw it-tieni u t-tielet b’11.37 u 11.40 rispettivament.
Claire Azzopardi (Pembroke Athleta) rebħet il-100 metru tan-nisa b’ħin ta’ 12.38 quddiem Sarah Busuttil (Pembroke Athleta) 12.56 u Ylenia Pace 12.78 (St. Patricks).
Riżultat importanti kien reġistrat anke fit-triple jump tal-irġiel fejn Ian Paul Grech (Pembroke A.) kellu qabża ta’ 15.01 metru, li jfisser erba’ ċentimetri biss anqas mir-rekord nazzjonali, li koinċidentalment jappertjeni għall-President il-ġdid tal-MAAA. Dan ir-rekord ilu jinżamm minnu mil-Logħob tal-Pajjiżi ż-Żgħar tal-Lussemburgu tal-2013 fejn Grech kien rebaħ midalja tal-bronż.
Il-President tal-MAAA, Andy Grech, esprima s-sodisfazzjon tiegħu kemm għall-organizzazzjoni tal-avveniment kif ukoll għar-riżultati miksuba: “Minkejja li l-atleti ma kienux qed jikkompetu f’dawn l-aħħar erba’ xhur, ir-riżultati juri li huma u l-kowċis tagħhom qatt ma waqfu jaħdmu. Dawn ir-riżultati huma xhieda ta’ kreattività u dedikazzjoni għal dan l-isport”.
L-avveniment ristrett li jmiss huwa skedat għas-Sibt li ġej 4 ta’ Lulju.
F’riżultati oħra Antonella Chouhal (Rush AC), rebħet il-hammer throw tan-nisa b’43.78m.
Claire Azzopardi wettqet double meta rebħet ukoll it-triple jump. Azzopardi li għandha f’idejha r-rekord nazzjonali ta’ din il-kategorija, qabżet 12.34m, riżultat pożittiv ħafna f’din il-fażi tal-istaġun.
Luke Farrugia (Rush AC) rebaħ id-Discus quddiem Mario Mifsud b’50.17m kontra 38.21.m. It-tellieqa tal-400 metru rġiel kienet dominata mill-atleta ta’ Pembroke A. Christian Luke Chetcuti li temm f’51.72 filwaqt li dik tan-nisa ntrebħet minn Sarah Chouhal (Rush AC) f’ħin ta’ 1:01.05.
L-aħħar telliqa kienet dik tal-200 metru, fejn l-atleta ta’ Pembroke Janet Richard rebħet it-tellieqa femminili f’ħin ta’ 25:31 filwaqt li Jeremy Zammit, atleta li għadu fil-kategorija ta’ taħt it-18-il sena rebaħ dik tal-irġiel f’22.81.
