Richard Schultheis mill-Malta Young Sailors Club li għandu tlettax -il sena kompla jiddomina l-klassi Optimist Gold (Open & Cadet) fit-tielet jum tal- Euromed Championship 2018.

Organizzata mill-Malta Young Sailor Club, it-tlielaq qed jisiru fil-bajja tal-Mellieħa u l-kundizzjonijiet tar-riħ kienu ftit iktar b’saħħithom mill-aħħar jumejn. Il-Gold Fleet tal-Classi Optimist, raw liż-żgħażugħ Richard Schultheis iżomm postu fil-quċċata filwaqt li l-Ungeriż Soma Kis-Szölgyémi u l-Iżvizzeru Jeanlou Lauber, li kiseb żewġ postijiet fit-tlielaq tal-lum ippermettewlu jikseb it-tielet post. Fil-Flotta Silver, Alana Twomey mill-Irlanda, Daniil Perchik mir-Russja u Annie Samis mill-Istati Uniti ħadu l-ewwel, it-tieni u t-tielet post rispettivament.

Dawn il-riżultati raw preżenza femmili tajba iżda ma kien hemm l-ebda tibdil fil-leaderboard fil-Klassi Optimist Novice, bil-Kroati Vito Božovic u Oliver Bilic iżommu l-pożizzjonijiet miksuba l-bieraħ. Vanja Ramm Ericsson, li qedgħa tirrappreżenta l-Royal Malta Yacht Club, ingħaqdet ma’ Božovic u Bilic għal darb’oħra. Bl-istess mod, il-flotta tal-Laser 4.7, Standard u Radial ma raw l-ebda tibdil fil-pjazzamenti miksuba l-bieraħ. L-aħjar kompetituri Maltin f’din il-Klassi kienu Saul Vassallo (it-3 post, Klassi 4.7), Karl Miggiani (it-3 Post, Klassi Standard) u Zachary Zammit (it-Tieni Post, Klassi Radjali). Dawn il-kompetituri kollha jirrapreżentaw lil Malta Young Sailors Club.

Intant għada s-Sibt 22 ta’ Diċembru jsiru l-aħħar tlielaq li jibdew fl-10 ta’ filgħodu. L-Għoti ta’ premijiet isiru iktar tard wara nofshinar.

Id-19-il edizzjoni tar-Regatta Euromed hija sponsorjata minn Mapfre Middlesea u appoġġata minn Yachting Malta.