Futbol internazzjonali
Serie A – Juventus jirbħu l-Allianz Stadium u jitilgħu fir-raba’ post tal-klassifika

Juventus 3   Sassuolo 1

Juventus telgħu fir-raba’ post tal-klassifika b’rebħa fl-Allianz Stadium kontra Sassuolo bl-iskor ta’ 3-1. Sa tmiem l-ewwel taqsima r-riżultat kien għadu 0-0, biss Sassuolo spiċċaw b’għaxar plejers eżatt qabel marru jistrieħu meta tkeċċa Obiang mat-tieni minuta fuq il-ħin regolamentari tal-ewwel taqsima.

Fit-tieni taqsima kienu l-bianconeri li fetħu l-iskor permezz ta’ Danilo meta sab ix-xibka fil-50 minuta. Sassuolo, avolja bi plejer inqas, ġabu l-iskor indaqs fit-58 minuta permezz ta’ Defrel. Aaron Ramsey reġa’ poġġa lil Juventus minn fuq fit-82 minuta u Cristiano Ronaldo għalaq il-logħba bit-tielet gowl mat-tieni minuta fuq il-ħin regolamentari.

Illejla tintlagħab logħba waħda mis-Serie A, meta fid-20:45 Spezia jilagħbu kontra Sampdoria.

Miktub minn...
Chris Falzon
Ġurnalist ta' TVM Sport. Isegwi l-isport lokali u internazzjonali. Isegwi u jirrapporta l-futbol lokali u internazzjonali. Huwa parti mit-tim tal-produzzjoni tal-programm 90 MINUTA