Sports Internazzjonali
Skont il-magazine Forbes: Lionel Messi l-aktar sportiv li qala’ flus fl-2018..aktar minn €112-il miljun

Skont il-magazine Forbes, Lionel Messi hu l-aktar sportiv li qala’ flus tul is-sena li għaddiet.

Messi, li skurja 36 gowl u għen lil Barcelona jirbħu l-kampjonat, matul is-sena li għaddiet daħħal mal-112-il miljun ewro li jinkludu flus f’salarji u bonuses oħra. Dan l-ammont tellgħu fl-ewwel post fil-lista tal-aktar 100 atleta mħallsa.

Cristiano Ronaldo, l-attakkant ta’ Juventus, hu stmat li daħħal mas-96 miljun ewro filwaqt li l-Brażiljan Neymar ta’ Paris St Germain daħħal mat-92 miljun ewro.

Fir-raba’ post tal-aktar sportivi mħallsin tas-sena 2018, hemm il-boxer Messikan Canelo Alvarez, stmat li daħħal mat-83 miljun ewro filwaqt li fil-ħames post hemm it-tennista Żvizzeru Roger Federer, stmat li daħħal mat-82 miljun ewro.

Floyd Mayweather, li kien fl-ewwel post tal-lista matul l-2017, mhux imniżżel mal-ewwel 100 sportiv li daħlu l-aktar flus fis-sena li għaddiet.

Mal-ewwel 100 atleta, hemm 62 li huma mill-Istati Uniti.

L-uniku mara li hemm fil-lista tal-ewwel 100 hi t-tennista Serena Williams, stmata li qalgħet kważi 26 miljun ewro.

Miktub minn...
TVM Sport