L-atleta Maltija Danica Bonello Spiteri kisbet post fil-Kampjonanti Dinjija li ser isiru s-sena d-dieħla. Fi tmiem il-ġimgħa li għaddiet Danica kienet fit-Turkija biex ittellaq fl-Ironman 70.3 International Triathlon. Hija mhux biss rebħet il-kategorija ta’ bejn il-35 u 39 sena imma spiċċat fit-tielet post overall tal-kompetizzjoni.

L-Ironman kienet tikkonsisti minn għawma ta’ 1.9 kilometri, 90 kilometru fuq ir-rota u ġirja ta’ 21.1 kilometri għal total ta’ 113-il kilometru. B’kollox ħadu sehem 821 atleta minn 55 pajjiż differenti, fosthom 127 atleta femminili. Minħabba l-miżuri tal-pandemija tal-Covid-19, l-atleti kellhom jaqbżu l-baħar wieħed wieħed kull sitt sekondi u mhux kollha f’daqqa.

Danica Bonello Spiteri għamlet wieħed mill-aħjar ħinijiet fl-istorja tat-triathlon Maltija, b’dan it-tragward jikber fil-valur tiegħu meta wieħed iqis li sa sena ilu l-atleta kienet għadha kif welldet tarbija. L-atleta Bonello Spiteri hija waħda mill-aqwa atleti fit-triathlon, tant li fil-passat irrappreżentat lil Malta fil-Logħob tal-Commonwealth li saru fi Glasgow u l-Logħob Ewropew li sar f’Baku. It-tellieqa f’Antalya, it-Turkija, kienet l-ewwel waħda fuq distanza daqstant twila għall-atleta, 14-il xahar wara li kellha l-ewwel wild tagħha.

Danica Bonello Spiteri ħarġet mill-ilma fil-ħames post, filwaqt li żammet pass b’saħħtu bil-ġirja fuq ir-rota. Fl-aħħar ġirja Danica rnexxilha żżid il-pass u anke qabżet żewġ postijiet biex temmet fit-tielet post overall. Hi lestiet it-tellieqa f’ħin ta’ 4 sigħat 31 minuta u 34 sekonda quddiem Olen Zhushman tal-Ukrajna u Nicole Boyd tar-Renju Unit.