Futbol lokali
Tarxien Rainbows FC: Plejers f’allegat każ ta’ tixħim dwar diversi partiti ta’ dan l-istaġun

Tarxien Rainbows FC, il-klabb tal-kampjonat BOV Premier, jinsab għaddej minn burraxka sħiħa hekk kif fl-aħħar sigħat ħareġ fl-apert li diversi plejers huma possibbilment imdaħħlin f’tixħim ta’ partiti ta’ dan l-istaġun.

Sorsi ta’ TVM Sport jikkonfermaw li t-total ta’ plejers involuti f’dan it-tixħim ilaħħaq il-ħamsa, u possibbilment erbgħa huma Maltin u wieħed hu barrani.

TVM Sport għandu wkoll informazzjoni li l-partita li sparkjat dan il-każ kollu kienet proprju d-derby kontra Hibernians tas-26 ta’ Novembru li għadda, li ċ-champions kienu rebħu 3-0.

Għadu mhux magħruf jekk fost id-diversi partiti li huma ndikati li fihom sar possibbilment it-tixħim, kienux involuti biss plejers mill-klabb ta’ Tarxien Rainbows u possibbilment anki plejers li lagħbu kontra tagħhom.

Il-verżjoni ta’ Tarxien Rainbows

TVM Sport tkellem ma’ Edward Calleja, Viċi President tal-klabb, li min-naħa tiegħu kkonferma l-aħbar.

“Il-klabb hu vittma ta’ din is-sitwazzjoni. Aħna qegħdin ‘stand-by’ nistennew mingħand il-Malta Football Association u l-Pulizija ta’ Malta. Bħalissa ma nistgħux nagħmlu pass waħedna,” qal Calleja.

TVM Sport għandu informazzjoni li qabel waħda mis-sessjonijiet ta’ taħriġ tal-ġimgħa li għaddiet, uffiċjali tal-klabb ta’ Tarxien Rainbows tkellmu mal-plejers fid-‘dressing room’, u nfurmawhom li l-klabb kellu informazzjoni minn terzi persuni li kien hemm uħud minnhom involuti f’tixħim f’diversi partiti.

Madankollu, TVM Sport jinsab infurmat li l-klabb Tarxiniż m’għandu evidenza ta’ xejn u li jekk din teżisti, qiegħda biss f’idejn l-MFA u l-Pulizija ta’ Malta.

Bdejna l-investigazzjonijiet – l-MFA

TVM Sport tkellem ukoll ma’ Franz Tabone, Integrity Officer tal-MFA, fejn min-naħa tiegħu kkonferma l-każ, iżda qal biss:

“Bdejna l-investigazzjonijiet flimkien mal-Pulizija ta’ Malta.”

Fis-snin li għaddew, f’Malta kellna diversi każijiet relatati ma’ korruzzjoni. F’dawn il-każi dejjem daħlet il-ġustizzja tal-pajjiż u dik sportiva. Minn dik sportiva, diversi plejers ġew sospiżi għmorhom minn kull attività tal-futbol u saħansitra, fejn kienu nvoluti uffiċjali, ġew relegati klabbs għal diviżjonijiet inferjuri u tnaqqis ta’ punti.

Miktub minn...
Mark Attard
Ġurnalist ta' TVM Sport. Isegwi l-Isport lokali u internazzjonali. Isegwi u jirraporta l-football lokali u internazzjonali. Jippreżenta l-programmi UEFA Europa League Highlights u UEFA Champions League Highlights.
Aħbarijiet Oħra
Futbol lokali

F’aħbar li għadha qiegħda tiżvolġi, Valletta FC jidhru li huma interessati fl-akkwist tal-ex-atleta Usain Bolt li bħalissa qiegħed jitħarreġ fl-Awstralja mat-tim tas-Central Coast Mariners. F’kummenti li l-President ta’ Valletta FC,…

Futbol lokali

Aħbar partikolari mill-Awstralja tista’ toħloq ċertu interess fil-futbol Malti, hekk kif kmieni dalgħodu, is-Sydney Daily Telegraph qiegħda tirrapporta lit-tim ta’ Valletta FC huma interessati fl-attakkant Usain Bolt li bħalissa qiegħed…

Futbol lokali

Wara r-rebħa kontra l-Ungerija u l-ewwel punti fil-grupp, it-team nazzjonali Malti ta’ taħt il-21 sena għada jmissu jiffaċċja lil Ċipru f’partita oħra home u l-aħħar waħda f’dan iċ-ċiklu ta’ kwalifikazzjonijiet…

Aktar