Futbol internazzjonali
Tazza tar-Re – Kwartifinali: Real Madrid u Barcelona xxukkjati u eliminati mill-kompetizzjoni

Real Madrid 3   Real Sociedad 4

Xokk fil-kwartifinali tat-Tazza tar-Re meta Real Sociedad marru fis-Santiago Bernabeu u għelbu lil Real Madrid bl-iskor ta’ 4-3. Dan ifisser li l-Madrileni ġew eliminati f’fażi aktar bikrija mill-istaġun li għadda, għaliex fl-2019 kienu tilfu ma’ Barcelona fis-semifinali. Real Sociedad fetħu l-iskor mat-22 minuta permezz ta’ Odegaard, vantaġġ li żammewh sa tmiem l-ewwel taqsima. Fit-tieni taqsima, f’temp ta’ żewġ minuti, Isak skorja darbtejn biex fetaħ tliet gowls vantaġġ għal Real Sociedad meta sab ix-xibka fl-54 u fis-56 minuta. Marcelo naqqas id-distakk għal-Los Blancos mas-siegħa logħob u għamilhom 3-1, imma Merino reġa’ sab ix-xibka għas-Sociedad u sas-70 minuta l-iskor kien 4-1. Minn hemm ‘il quddiem Real Madrid pruvaw iwettqu reazzjoni b’saħħitha ħafna u Rodrygo naqqas id-distakk fil-81 minuta u għamilhom 4-2, bl-aħħar gowl tal-Madrileni jasal minn Nacho fit-tielet minuta fuq il-ħin regolamentari.

It-tielet gowl ta’ Real Madrid wasal tard wisq biex jippruvaw għallinqas iġibu l-iskor indaqs u jisfurzaw il-ħin barrani, u għaldaqstant spiċċaw eliminati minn din il-kompetizzjoni.

 

Athletic Bilbao 1  Barcelona 0

F’dak li jista’ jitqies xokk ieħor fit-Tazza tar-Re, Athletic Bilbao għelbu lil Barcelona 1-0 bl-għajnuna ta’ wieħed mid-difensuri tat-tim Katalan. Barcelona, li fl-edizzjoni tas-sena l-oħra kienu waslu sal-finali mbagħad tilfu ma’ Valencia, din id-darba spiċċaw eliminati kiesaħ u biered b’gowl li wasal fit-tielet minuta fuq il-ħin regolamentari tal-logħba. Mill-cross fil-kaxxa Sergio Busquets bir-ras prova jtajjar il-ballun imma minflok spiċċa biex tefa’ fix-xibka tiegħu stess u qata’ passaġġ lil Athletic Bilbao għas-semifinali tat-Tazza.

Miktub minn...
Chris Falzon
Ġurnalist ta' TVM Sport. Isegwi l-isport lokali u internazzjonali. Isegwi u jirrapporta l-futbol lokali u internazzjonali. Huwa parti mit-tim tal-produzzjoni tal-programm 90 MINUTA
Aħbarijiet Oħra
Futbol internazzjonali

Manchester City ġew sospizi sentejn milli jikkompetu fil-kompetizzjonijiet Ewropej, UEFA Champions League u UEFA Europa League, għal ksur serju fir-regoli tal-financial fair play. Apparti din is-sospensjoni li tista tiġi appellata,…

Futbol internazzjonali

Tard ilbieraħ filgħaxija, il-President ta’ Juventus Andrea Agnelli u d-Direttur Ġenerali Fabio Paratici, sejħu lill-kowċ Maurizio Sarri biex miegħu jiddiskutu l-futur ta’ Juventus għal kumplament tal-istaġun. Jidher li din il-laqgħa…

Futbol internazzjonali

Juergen Klinsmann irriżenja minn kowċ ta’ Hertha Berlin wara 10 ġimgħat biss minn meta nħatar. Klinsmann qal li kemm ilu fil-kariga sab nuqqas ta’ appoġġ u fiduċja. L-ex Champion tad-Dinja…

Futbol internazzjonali

It-tliet darbiet rebbieħ tat-Tazza tad-Dinja, Edson Arantes Do Nascimento Pele, ma jridx joħroġ mid-dar minħabba li ma jistax jimxi sew u mingħajr l-għajnuna ta’ ħaddieħor. Din l-aħbar żvelaha ibnu stess,…

Aktar