Futbol lokali
The Convenience Summer Cup 2019 – San Ġwann jibqgħu jżommu l-ewwel post

San Ġwann baqgħu jżommu l-ewwel post tal-klassifika ta’ The Convenience Summer Cup 2019 hekk kif intlagħbet it-tieni ġurnata ta’ dan it-turnament annwali ta’ qabel l-istaġun.

It-tim immexxi minn Jean Paul Desira xejn ma sabha faċli jegħleb lil Qormi u kellhom ikunu l-għoti tal-penalties li tahom il-punti meħtieġa.

Anke Żebbuġ Rangers kellhom imorru għall-penalties sabiex għelbu lil Żejtun Corinthians sabiex ġew dikjarati rebbieħa ta’ dan il-konfront.

Fil-fatt f’dan it-turnament jekk il-logħba tispiċċa fi dro sa tmiem id-disgħin minuta, jingħataw mal-ewwel il-penalties fejn it-tim rebbieħ jieħu żewġ punti filwaqt li dak tellief jieħu punt. Min-naħa l-oħra jekk ikun hemm rebħa diretta fid-90 minuta,  tim jieħu tliet punti.

Kif għedna San Ġwann kisbu t-tieni suċċess ta’ dan it-turnament meta f’logħba ferm sabiħa huma għelbu lil Qormi 6-5 bl-għoti tal-penalties.

Il-logħba sad-90 minuta spiċċat fi dro ta’ 1-1. Kienu San Ġwann li marru fil-vantaġġ wara biss 30 sekonda grazzi għal Jake Bowman li wara li rċieva mingħand Jean Paul Attard, baqa’ javvanza filwaqt li qabbeż il-ballun minn fuq il-gowlkiper avversarju.

Ftit wara Qormi ngħataw penalty wara rregolarita’ fil-kaxxa ta’ San Ġwann. Mill-11-il metru kien Freud li ra x-xutt tiegħu milqugħ ferm tajjeb mill-keeper ta’ San Ġwann Jean Matthias Vella.

Hekk kif l-ewwel taqsima għalqet b’San Ġwann 1-0 minn fuq, fit-tieni taqsima Qormi ħarġu aggressivi fit-tentattiv li jġibu l-iskor indaqs tant li għamlu dan fil-81 minuta meta wara kross tajjeb, kien Tensior Guzman li bir-ras għeleb lill-keeper avversarju.

Il-logħba kellha tiġi deċiża mix-xuttijiet mill-11-il metru fejn hawnhekk kienu ferm bravi San Ġwann li skorjaw erbgħa mill-ħames penalties li taw filwaqt li Qormi skorjaw tlieta.

Din ir-rebħa għenet lill-organizzaturi ta’ dan it-turnament li jżommu l-ewwel post tal-klassifika u għandhom żewġ punti vantaġġ fuq l-eqreb rivali tagħhom Qormi FC.

F’din it-tieni ġurnata kellna d-debutt pożittiv ta’ Żebbuġ Rangers illi wkoll sabuha diffiċli sabiex jiksbu żewġ punti hekk kif għelbu lil Żejtun Corinthians 9-8 wara l-għoti tal-penalties. Għal dawn tal-aħħar din kienet it-tieni telfa bil-penalties wara li fl-ewwel ġurnata kien ġralhom l-istess kontra Qormi FC.

Kienu Żebbuġ Rangers li marru fil-vantaġġ fit-38 minuta permezz ta’ Saturday Nanapere li kompla jikkonferma l-potenzjali tiegħu quddiem il-lasta avversarja.

Wara li ż-Żebbuġin marru jistrieħu 1-0 minn fuq, Żejtun Corinthians ħarġu b’aktar grinta fit-tieni taqsima tant li ġabu l-iskor indaqs fil-65 minuta permezz tal-plejer Brażiljan Ribeiro Santos li għeleb lill-gowlkiper tar-Rangers. Huma ppruvaw jagħlqu l-konfront qabel id-90 minuta iżda sabu lill-gowlkiper ta’ Żebbuġ isalva dak li ġie għal idejh.

Il-logħba marret għall-għoti tal-penalties u wara li ngħataw sittax-il penalty, kienu Żebbuġ Rangers li ħarġu rebbieħa bl-iskor kumplessiv ta’ 9-8.

KIF JINSABU

San Ġwann 5, Qormi FC 3, Żebbuġ Rangers, Żejtun Corinthians 2, Mġarr United 0

Matul din it-tieni ġurnata Mġarr United ma kinux fl-azzjoni.

 

Miktub minn...
robert busuttil
Ġurnalist ta' TVM Sport. Isegwi l-Isport lokali u internazzjonali. JIkkumenta l-logħob tal-kampjonat Premier. Jippreżenta programm sportiv fuq radju tal-komunita'.
Aħbarijiet Oħra
Futbol lokali

L-ex difensur ta’ Hibernians u Gżira United, Rodolfo Soares se jingħaqad maċ-champions tal-futbol Għawdxi, Nadur Youngsters. Id-difensur ta’ 35 sena ilu għal dawn l-aħħar żewġ staġuni ma’ Gżira United. Il-Brażiljan…

Futbol lokali

Il-plejer internazzjonali Malti Joseph Mbong jista’ jingħaqad ma’ Hamrun Spartans fis-sigħat li ġejjin. TVMSport jista’ jikkonferma li Hamrun Spartans diġà tkellmu ma’ Hibernians u mal-plejer innifsu. Jidher li bejn Hamrun…

Futbol lokali

Sitt gowls ta’ Zvezdan Vukovic għenu lil White Eagles jirbħu s-Super Cup  organizzata mill-Malta MiniFootball Association meta fil-grawnd tal-Marsa huma għelbu lil United Stars bl-iskor ta’ 10-7. Din kienet l-aħħar…

Futbol lokali

Il-plejer internazzjonali ta’ Malta tat-tim tan-nisa Emma Louise Lipman ingħaqdet mal-klabb Taljan ta’ Lazio. Lipman iffirmat kuntratt ta’ sena, b’opzjoni li jiġġġedded. Lipman twieldet fl-Ingilterra iżda għanda dixxendenza Maltija u…

Aktar