Sports Internazzjonali
Tokyo 2020: Issa anke Sebastian Coe irid li jkunu posposti, tiżdied il-pressjoni fuq il-KOI

Ikomplu jaslu aktar messaġġi diretti u talbiet uffiċjali sabiex l-Olimpijadi tas-Sajf li ġej f’Tokyo jkunu posposti.

It-Tnejn kien il-President tal-IAAF il-Federazzjoni Internazzjonali tal-Atletika Lord Sebastian Coe li f’ittra li bgħat lill-President tal-Kumitat Olimpiku Internazzjonali Thomas Bach talbu sabiex jirrenja s-sens komun u t-32 edizzjoni tal-Olimpijadi ta’ din is-sena jkunu posposti.

Fl-Ittra tiegħu Coe semma tliet fatturi prinċipali għaliex l-Olimpijadi għandhom ikunu posposti fosthom:

1. Il-Kwistjoni ta’ fair play. Coe qed jgħid li mhux kull atleta bħalissa jista’ jittrenja kif jixtieq hemm pajjiżi li għandhom tracks u gyms miftuħin u oħrajn le.

2. Il-Kwistjoni ta’ injuries. Coe qed jgħid li peress li m’hemmx kontinwazzjoni ta’ taħriġ hemm ċans li l-atleti jekk isiru l-Olimpijadi fis-Sajf li ġej jippruvaw jistinkaw dak il-ftit iktar fil-kompetizzjoni u jistgħu jweġġgħu.

3. L-effett emozzjonali tal-Atleti. Coe tal-opinjoni li s-istwazzjoni ta’ inċertezza qed toħloq ansjeta’ żejda lill-atleti, lill-coaches u anke lill-uffiċjali.

Il-President tal-IAAF żied jgħid li l-maġġoranza tal-Presidenti tal-Federazzjonijiet nazzjonali jaqblu miegħu li l-Olimpijadi għandhom ikunu posposti b’sena.

 

Miktub minn...
TVM Sport
.