Waterpolo
Waterpolo: Sliema, Sirens u Neptunes b’rebħiet fir-round preliminari

Round Preliminari Grupp A

Sliema Frank Salt 14  Marsaskala Fish & Fish 8

Rebħa għal Sliema fir-round preliminari kontra Marsaskala meta rebħu tlieta minn erba’ sessjonijiet u ħarġu rebbieħa 14-8. Fl-ewwel sessjoni Sliema rebħu 3-1, it-tieni waħda rebħuha 4-1 u t-tielet 6-3, sakemm fir-raba’ u l-aħħar sessjoni l-Islimiżi naqqsu xi ftit ir-ritmu u Marsaskala ħadu ċ-ċans biex rebħuha 3-1. L-aqwa skorer għal Sliema kien Jerome Gabarretta li skorja 4 filwaqt li għal Marsaskala l-gowls kienu maqsuma bejn il-barranin Kristijan Milakovic u Konstantin Averka li skurjaw 4 kull wieħed.

Round Preliminari Grupp B

Sirens Greentube 20  Ta’ Xbiex Amigos 11

Sirens ħarġu rebbieħa fuq Ta’ Xbiex bl-iskor ta’ 20-11 f’logħba oħra mir-round preliminari, din id-darba minn Grupp B. Sirens superjuri prattikament matul il-logħba kollha fejn rebħu l-ewwel tliet sessjonijiet, 4-0, 6-4 u 4-2. B’rashom mistrieħa mir-rebħa, Sirens naqqsu l-inizjattiva u fl-aħħar sessjoni taw aktar ċans lil Ta’ Xbiex biex spiċċaw fi draw ta’ 5-5, b’riżultat finali ta’ 20-11. L-aħjar skorer għal Sirens kien Christian Presciutti li skurja ħamsa, filwaqt li għal Ta’ Xbiex Nenad Kacar skorja 5 wkoll.

Neptunes Leo Vegas 21  Valletta Videoslots 13

Is-saħħa tan-Neptunes ħarġet kontra Valletta meta rnexxilhom ixejnu l-isfida tal-avversarji u rebħulhom 21-13. In-Neptunes rebħu tlieta mill-erba’ sessjonijiet, bl-ewwel waħda tintemm 4-2 favurihom. It-tieni sessjoni kienet diżappuntanti ħafna għal Valletta tant li tilfuha 7-1, imma fit-tielet sessjoni l-Beltin dehru jwettqu reazzjoni u rebħuha 4-3. Sa dak il-ħin ir-riżultat kien 14-7 favur in-Neptunes li mbagħad rebħu l-aħħar sessjoni 7-6. Steven Camilleri u Petar Muslim skurjaw ħamsa kull wieħed għan-Neptunes, filwaqt li Dmitri Kholod skurja 7 mit-13-il gowl ta’ Valletta.

Miktub minn...
Chris Falzon
Ġurnalist ta' TVM Sport. Isegwi l-isport lokali u internazzjonali. Isegwi u jirrapporta l-futbol lokali u internazzjonali. Huwa parti mit-tim tal-produzzjoni tal-programm 90 MINUTA